မှတ်ဥာဏ်နှုန်းထားက ဘယ်အသက်အဆင့်လဲ

ဟိုတလောကက ငယ်သူငယ်ချင်းတစ်ယောက်နဲ့ တွေ့တော့ သူကပြုံးစိစိနဲ မေးတယ်.. ဒီမယ် အစ်မကြီး စာကျက်လို့ မှတ်လို့ အကောင်းဆုံးအရွယ်က ဘယ်အရွယ်လဲ သိပါတယ်နော်.. တဲ့။ သူနဲ့တွေ့တိုင်း ကွန်ပျူတာနား သို့မဟုတ် စာအုပ်ပုံကြား ရှိနေတတ်တဲ့ ကျွန်မကို “နင်က အခုထိ စာကျက်နေတုန်းပဲလား..။ ဘွဲ့တွေယူရင်း မြန်မြန် ဆံပင်ဖြူမယ့် အဖွားကြီးလောင်းလျာ” လို့ အမြဲနောက်တတ်သူပါ။

သူပြောတာလည်း ဟုတ်နေတော့ ကျွန်မ ရယ်ပြီး ပြန်ပြောမိတယ်။ ဟဲ့ ငါက စာကျက်ရတာ ၀ါသနာပါလို့ပါနော်.. လို့ (တကယ်က စာဆိုရင် စာလေးရော စာကြီးရော ကျက်မှတ်ရတဲ့ဘ၀ကို မလိုချင်တော့..။ ကျောင်းသားဘ၀ကို မြန်မြန်ကျွတ်ချင်လှပါပြီ.. ဟူးးးး )

သူငယ်ချင်းပြောသလိုပဲ တကယ်လို့များ လူတစ်ဦးရဲ့ မှတ်နိုင်စွမ်းကို အသက်အရွယ်နဲ့ပဲ သတ်မှတ်ပြောကြေးဆိုရင်တော့ ပညာရှင် Thorndikeက သုတေသနတစ်ခုနဲ့ အခိုင်အမာဆိုထားတာ မှတ်သားဖူးတယ်.. ။

ပညာရှင် Thorndikeရဲ့အဆိုအရ. ပုံမှန်လူတစ်ယောက်ဟာ..

၁) အသက် ၈ နှစ်မှ ၂၀နှစ် အတွင်းမှာ အကြောင်းအရာအသစ်တစ်ခုကို များများနဲ့ မြန်မြန် သင်ယူနိုင်စွမ်းရှိတယ်..။

၂) အသက်၂၀ နောက်ပိုင်းမှာ မှတ်ဥာဏ်အား ဖွံဖြိုးမှုအရှိန်နှေးလာပေမယ့် ဆက်တော့ဖွံဖြိုးနေမှာဖြစ်ပြီး အသက် ၂၅ နှစ်မှာ မှတ်ဥာဏ်အား အကောင်းဆုံး (peak) ဖြစ်တယ်..။

၃) အသက်၃၅ နှစ် နောက်ပိုင်းမှာတော့ မှတ်ဥာဏ်အား ဆုတ်ယုတ်စပြုလာပြီး အသက် ၄၅နှစ် ရောက်ချိန်မှာတော့ သူ့မှတ်ဥာဏ်အား peak အခြေအနေမှ ၂၂ % လျော့ကျနေပြီး ဖြစ်ပါတယ်..။

၎) အသက် ၅၀ရှိ လူတစ်ဦးရဲ့ မှတ်နိုင်စွမ်းသည် အသက် ၁၅ နှစ်သားရဲ့ မှတ်နိုင်စွမ်းလောက် ကျန်နိုင်ပါတယ်။

၅) အသက်၇၀ ရှိ လူတစ်ဦးရဲ့ မှတ်နိုင်စွမ်းကတော့ ပုံမှန် ကလေး ၁၀နှစ်သားရဲ့ မှတ်နိုင်စွမ်းနဲ့ တူနိုင်ပါတယ်..

ကဲ.. ကျွန်မရဲ့ သူငယ်ချင်းများရော လက်ရှိ မှတ်ဥာဏ်နှုန်းထားက ဘယ်အသက်အဆင့်များ ရှိနေပြီလဲ ..ဟင် ။ ကျွန်မလား.. ကျွန်မကတော့ အခု မှတ်ဥာဏ်အား ဆုတ်ယုတ်စပြုနေပြီ။ ဒါကြောင့် အခု စာမကျက်ချင်တော့ဘူး၊ ဘလော့ပဲ ထိုင် ဘလော့ချင်တော့တယ် (^0^)/

………………………………………………………….

မှတ်ချက်။ ။ တကယ်တော့ အကြောင်းအရာတစ်ခုကို သင်ယူနိုင်စွမ်း၊ မှတ်သားနိုင်စွမ်းသည် အသက်အပိုင်းအခြား တစ်ခုတည်းနဲ့တော့ ဆုံးဖြတ်လို့ မရပါဘူး။ အသက်အရွယ်အပြင်၊ အကြောင်းအရာပေါ် လိုက်ပြီး ယောက်ျားမိန်မ မှတ်နိုင်စွမ်းကွဲပြားမှု၊ တစ်ဦးချင်းစီ၏ ဥာဏ်ရည်၊ ဗီဇ၊ ကာယကံရှင်၏ သင်ယူလိုစိတ်၊ ထိုသူ၏ စိတ်ပိုင်းဆိုင်ရာ တည်ငြိမ်မှု စသည့်အပေါ်တွေမှာလည်း မှုတည်နိုင်ကြောင်းပါ..တဲ့။ ဗဟုသုတပေါ့နော်..

လသာည ဖြစ်ပါတယ်…