၂၀၀၇ ခုနှစ်ထဲက ဖေ့ဘုတ်ရွာထဲ ၀င်လာခဲ့တာပါ။ ဒါပေမယ့် သူနဲ့ အခုထိ နေသားမကျတဲ့ ဧည်သည့်တစ်ယောက်လိုပဲ။
ရွာထဲဝင်ကာစ အစောပိုင်းကာလတွေမှာ ကိုယ့်ရဲ့ သူငယ်ချင်း နည်းနည်းလေးနဲ့ ဓါတ်ပုံတွေတင်ပြီး၊
စ လိုက် နောက်လိုက်၊ သူ့သတင်း ကိုယ့်သတင်း အပြန်အလှန်ပြောလို့ ဟာသတွေ လုပ်ပြီး တကယ့်ကို
ပျော်စရာကောင်းတယ်။ ဖဘက တကယ်ဆွဲဆောင်ခဲ့တယ်။
နောက်ပိုင်းတော့
သူငယ်ချင်းတွေ များ... များ... လာ...တယ်။ ကိုယ့်လိုပဲ ကိုယ့် သူငယ်ချင်းတွေမှာလည်း နောက်ထပ်
သူငယ်ချင်းတွေ များများလာတယ်။ ဒီလိုနဲ့ သူ့သူငယ်ချင်း၊ ကိုယ့်သူငယ်ချင်းပေါင်းပြီး
သူငယ်ချင်းတွေ သူငယ်ချင်းတွေ များ…များ…၊ ဆပွားလာခဲ့တယ်။
လူကများလာတော့ တက်လာတဲ့ ပိုစ်တိုင်းကို မဖတ်နိုင်တော့သလို လူတိုင်းစေ့ နှုတ်မဆက်နိုင်တော့ဘူး။ တခါတခါ လူမူရေး သတင်းမေးစရာတွေ မမေးလိုက်မိတာတွေလည်း ရှိတယ်။ သူငယ်ချင်း အရင်းကြီးတွေရဲ့ မွေးနေ့လိုဟာမျိုးတောင် wish မလုပ်ဖြစ်တာတွေ ရှိလာတယ်။
နောက်ပြီး လူများတော့ သတင်းတွေကလည်း များလာတယ်။ သတင်းတွေကလည်း ရသမျိုးစုံ၊ အငို၊ အကြမ်း၊ အလွမ်း စုံနေတာပါပဲ။ ဒီတော့ ဘာနဲ့တူလည်းဆိုတော့ ရွာလုံးကျွတ် စတုဒီသာကျွေးတဲ့ မဏ္ဍပ်ကြီးလိုပဲ တစ်အိမ်ချင်းစီက စားစရာတွေ တည်ခင်းဧည့်ခံနေတာလိုမျိုး ချိုချဉ် ဖန်ခါး ရသာစုံ ရွေးချယ် စားသောက်လို့ ရနေတော့တာပေါ့။ တနေ့တနေ့ အဲဒီမဏ္ဍပ်ထဲ တ၀ဲလည်လည်နဲ့ အိမ်ပြန်စားချိန် သောက်ချိန်သတိမရတဲ့ အထိပါပဲ။ နောက်ဆုံး ဖေ့ဘုတ်ရွာထဲ တမေ့တမော နေမိပြီး ကိုယ့်ဘလော့အိမ်ကိုတောင့် မေ့တတ်လာခဲ့တယ်။ ကိုယ့်ရဲ့ ကိုယ်ပိုင်အချိန် ရှားပါးလာတာလည်း ပါပါတယ်လေ...
ဒါပေမယ့်ကွယ်.. ဖေ့ဘုတ်ကြီးထဲမှာ လျှောက်လည်ရင်း အခုတလောတော့ မွမ်းကျပ်သလိုလို ခံစားမိတယ်။
နေ့စဉ် တွေ့တွေ့သမျှ တနေ့တနေ့ သတင်းကာလာစုံတွေထဲမှာ သူများဆွေးရင် လိုက်ဆွေးလိုက်၊ သူများငိုရင်လိုက်၊ အရာရာကို ခံစားလွယ်..
မကြံ့ခိုင်တဲ့ နှလုံးသားပိုင်ရှင်ဖြစ်လေတော့.. ခက်တယ်။
ပိုဆိုးတာက
တချို့အကြောင်းအရာတွေအတွက် လူအများငြင်းခုံနေချိန်မှာ အမှားအမှန် မဆုံးဖြတ်နိုင်အောင် ဖြစ်ရတယ်။ ကိုယ်သိပ်မသိသေးတာတွေက အများသား၊ သင်ယူစရာတွေကလည်း အများသားဆိုတော့.. ဒီတစ်ယောက်က ဒီလိုပြောရင်
ဒါ ဟုတ်နိုးနိုး၊ ဟိုတစ်ယောက်က ဟိုလိုပြောရင် ဟိုဟာ ဟုတ်နိုးနိုးနဲ့ ယောင်တောင်တောင်
လက်ခုပ်တီးသူ ဖြစ်နေခဲ့တယ်။
တခါတခါမှာ ကိုယ့်ဝေါလ်ပေါ် သူများရှယ်လာတဲ့ အကြောင်းအရာတစ်ခုတည်းကိုပဲ..
သဘောတူနေတဲ့ "ငါ" နဲ့ သဘောမတူတဲ့
"ငါ"…( "ငါ" နဲ့"ငါ") အချင်းများ စစ်တိုက်နေရတယ်၊
ဒီလိုနဲ့ပဲ မျက်မှောင်ကြုတ်ထားမိတဲ့ နှဖူးကြောကို "ငါ" အခုထိ ပြန်မဖြေဖြစ်သေးပါလား..။
No comments:
Post a Comment